جار القمر

السخيف فى الصورة هوه التكرار, الواحد متعود من أول البطولة دى و البطولة اللى فاتت كمان إنه بيتقال "مبروك النصر لمصر" أو "مبروك لمصر" إنما تكرار "مبروك" مرتين حاجة بيضان, جديدة على ثقافتنا الكروية و بتؤكد إن وزارة الخارجية لا تملك غير التكرار, لأن أى مؤسسة سيادية تانية أو حتى أهلية كانت هاتستجيب أكتر للأدبيات الكروية و مش هاتغلط الغلطة دى, اللى أكد لى دا إن الكتابة على الواجهة اللى على يمينك لو انت قاعد معايا على المدرجات الحجرية الموجودة على النيل أدام مبنى الخارجية, أو على شمالك لو انت قاعد على الكراسى فى مبنى الخارجية هيه اللى اتكتبت الأول, و الكتابة على الواجهة التانية اتكتبت من باب الكرم الريفى اللى بيعتمد على الكمية أكتر من اعتماده على الكواليتى, كل دى أخطاء قللت من الفرحة أكيد

يبقى إن التدوينة فيها اخطاء كروية جسيمة, الماتش النهائى بتاع الكاميرون كان يوم الأحد 10 فبراير 2008, و "محمد زيدان" كان بيعافر مع "سونج" مدافع الكاميرون مش "دروجبا" مهاجم كوت إيفوار, لسبب بسيط هوه إن "دروجبا" فى نفس اللحظة كان بيعيط فى بيتهم على ضوء الشموع مع زوجته من دولة مالى الشقيقة بعد ما كوت إيفوار أخدت المركز الرابع قبلها بيوم السبت الموافق 9 فبراير 2008